Inmaculada

Presenta a María Inmaculada co aspecto dunha muller aínda moza, de pé, coas mans xuntas e un tanto desproporcionadas, á altura do peito en actitude recollida. Descansa flexionando levemente a perna dereita sobre a xa clásica e apocalíptica peaña con cabeciñas de anxos e lúa crecente. O rostro, de ollar ausente e ensimesmado, de fronte ancha e despexada, enmarcado por uns cabelos ondulados toucados cun velo branco que tamén cobre os escote. Viste túnica branca sementada de flores douradas, que deixa ver, baixo as súas mangas as dun xibón rosa. O manto envolvente recóllese sobre o brazo esquerdo en pregos brandos e convencionais para logo deixar flotando as puntas no aire.