A peza estudada é unha cabeza antropomorfa tallada en granito procedente do xacemento galaico-romano da Cidbá de Armea (Allariz, Ourense). Foi atopada na campaña de escavación de 2021 nun nivel asociado ao abandono da primeira ocupación do asentamento, datado a comezos do século I d. C. A escultura presenta un estilo moi esquemático, con trazos faciais simples, nariz prominente, ollos pouco definidos e posible representación do cabelo, e sen expresión emocional, o que a diferencia doutras cabezas máis naturalistas documentadas no mesmo lugar.

Segundo as autoras deste estudo, a súa función e significado interprétanse dentro dunha tradición simbólica ampla, relacionada co culto á cabeza propio das comunidades prerromanas, no que estas representacións actuarían como elementos rituais, identitarios ou protectores. A presenza desta escultura nun contexto xa romanizado reflicte a continuidade de crenzas e iconografías da Idade do Ferro, así como a súa integración na arquitectura e na memoria colectiva da comunidade que habitou Armea durante o cambio de era.