Na conferencia de onte, titulada “O berce do Homo erectus no altiplano etíope: os xacementos de Melka Kunture”, o profesor da UVIGO Eduardo Méndez Quintas destacou a importancia deste enclave para o estudo da evolución humana. A zona, que vén sendo investigada desde 1962 e actualmente baixo dirección italo-española, proporcionou unha secuencia arqueolóxica excepcional.
Novas
O luns 16 de xuño de 2025, na conferencia “Alén do Macizo Galaico: arqueoloxía galega no exterior”, David Fernández Abella abordou o papel de Galicia e España na arqueoloxía internacional. Mentres países como Francia consideran estratéxica a súa presenza arqueolóxica no exterior, España apenas mantén unha escola en Roma e só as universidades da Coruña e Vigo manteñen proxectos fóra das súas fronteiras. A UDC en Siria e Palestina, e a UVigo en Marrocos e Etiopía.
A conferencia “O Castro do Coto do Mosteiro revisitado 40 anos despois”, impartida por Luis Orero Grandal, presentou unha revisión dos traballos iniciados en 1983. O castro, situado nas inmediacións do Carballiño, revelou unha complexa estrutura defensiva con murallas de aparello helicoidal, foxos escavados na rocha e restos de canalizacións. Destaca a presenza de máis de 400 fragmentos de moldes de fundición en barro, indicativos dunha produción especializada en obxectos metálicos de adorno persoal.
📢 Aviso importante
Os días 15 e 22 de maio non se realizarán visitas guiadas por cuestións técnicas. Non obstante, a exposición permanecerá aberta ao público no seu horario habitual, de 9:00 h a 21:00 h.
Grazas pola súa comprensión e desculpen as molestias.
Na conferencia "Idade Media no Val do Alto Támega: o exemplo do conxunto arqueolóxico da Ceada das Chás– Castelo de Lobarzán", abordáronse aspectos clave das ocupacións prehistóricas e medievais na rexión. Durante a prehistoria, destacouse unha vía de comunicación relevante, cerámicas tipo peña en gran cantidade, evidencias de fondos de cabana e pinturas rupestres con figuras antropomorfas.
A conferencia “A neveira de Pardeconde e a conservación dos bens de madeira”, impartida onte por Luis Cordeiro Maañón e María Martín Seijo, abordou a escavación da neveira de Campo Eirado como exemplo paradigmático das estruturas tradicionais de almacenaxe de xeo na Península Ibérica. Activas desde a Idade Media, con especial desenvolvemento a partir do século XVI polo seu valor alimentario e terapéutico, estas infraestruturas reflicten unha evolución técnica e social significativa.
O luns 14 de abril, no Centro Cultural Marcos Valcárcel, Xose Pedro Rodríguez Álvarez e Arturo de Lombera Hermida guiáronnos nunha viaxe aos orixes do poboamento humano de Europa a través da Sima del Elefante (Atapuerca). Este xacemento, parte dun conxunto arqueolóxico excepcional, conserva ferramentas líticas e restos de fauna e homínidos que abarcan máis dun millón de anos. Na capa TE7 identificouse un fósil humano atribuído a Homo affinis erectus, con trazos máis primitivos ca Homo antecessor, o que engade un novo exemplar humano, e xa van cinco, neste xacemento.
Onte tivo lugar a conferencia “Arqueoloxía da violencia: de guerras e outras agresións”, impartida por Alfredo González Ruibal e organizada polo Museo Arqueolóxico Provincial de Ourense, centrada na análise histórica e arqueolóxica da violencia ao longo da historia e das respostas que a arqueoloxía pode achegar sobre ela.