Para esta peza do mes seleccionamos un pequeno conxunto de instrumentos de medición. En primeiro lugar, e, pola súa singularidade, damos a coñecer unha caixa de latón, rectangular, cos extremos curtos redondeados. A tapa únese mediante bisagras e, o mesmo cá base, leva un bordo de cana. Correspóndese cunha caixa para gardar tabaco, de orixe flamenga, empregada polos mariñeiros. O seu tamaño, uns 16 cm, permitíalles levala consigo no peto. Está decorada, na parte superior, cuns gravados representando un calendario perpetuo que permite ao propietario determinar o día da semana, e, na inferior, cunha táboa que serve para calcular a velocidade do barco.

O segundo instrumento que presentamos é un grafómetro de pínulas, utilizado para realizar medicións de ángulos en procedementos topográficos.

Por último, damos a coñecer un reloxo de sereno en caixa de latón. Este tipo de reloxos de marcación usábanse para poder controlar que o sereno ou garda fixeran a ruta que lles correspondía e á hora acordada, sen que puidesen variala.