Preséntase unha lucerna procedente do campamento militar de Aquae Querquennae, no concello de Bande, onde tería residido durante un tempo a cohors III da legio VII Gemina, para atender a vía XVIII que unía Braga (Bracara Augusta) e Astorga (Asturica Augusta). O xacemento, descuberto no ano 1921 por Florentivo L. Cuevillas, acompañado de Ramón Otero Pedrayo, Vicente Risco e Farruco Pena, ven sendo escavado dende 1975 por Antonio Rodríguez Colmenero, Francisco Hervés Raigoso e Santiago Ferrer Sierra.

Esta lucerna foi documentada na campaña do ano 1986, baixo a dirección do profesor Rodríguez Colmenero, nun contexto cronolóxico no intervalo 74-120 d.C. A súa funcionalidade está relacionada habitualmente coa iluminación artificial doméstica, pero tamén pódese empregar en outros contextos como os cultuais, tanto públicos como privados, ou nos funerarios.

Esta peza, aínda conservando apenas o corpo e parte do pico, permítenos coñecer o obradoiro do que procede grazas ao selo na base «FORTIS»; é dicir, procede do taller de Lucius Aemilius Fortis, localizado nas inmediacións de Módena, en Italia.