Esta peza está formada por tres fragmentos de vasos campaniformes atopados na Portela da Moada, un monumento megalítico que formaría parte da necrópole de Veiga de Maus de Salas, (Muíños). O megálito foi dado a coñecer por Florentino López Cuevillas en 1927 na revista Nós e reescavado en 1972 por X. Ferro Couselo, ante a afección que o encoro de Salas ía supoñer para estas necrópoles, intervención na que apareceron os tres fragmentos. Na actualidade non foi posible identificar a mámoa que describiu Cuevillas, polo que podería ter sido destruída.

As pezas que tratamos este mes pertencen ao Campaniforme Antigo, con datacións que en Galicia e no noroeste se remontarían ao 2800/2500 a. C., este tipo de cerámicas aparece nos monumentos megalíticos en momentos moi tardíos con respecto a un ritual que se manifesta desde o Neolítico Medio. Respecto ao seu uso, o xacemento de Devesa do Rei (Vedra, A Coruña) ofrece paralelos con recipientes campaniformes que conservaban residuos de fariña, produtos lácteos e mel ou hidromel.