Sen título (DX1028/23)

Pequeno fragmento de vidro multicolor correspondente ao corpo dunha cunca hemisférica baixa ou en calota correspondente á forma Isings 1.Dentro do vidro polícromo responde á variante millefiori, así chamada por presentar unha composición decorativa de tipo floral, resultado do compactado de segmentos de varetas, previamente elaboradas mediante a unión de varios fíos para conformar os diferentes motivos.

Variante formativa-decorativa especialmente perceptible na cara interior do fragmento, que pola morfoloxía baixa da peza sería a máis visible. Sobre unha matriz ou fondo melado escuro compactáronse segmentos ou teselas de varetas de vidro de tres tipos: en primeiro lugar segmentos que representan flores contornadas en cor azul celeste que no interior conteñen sete pétalos con botón central, todos de cor melado escuro e delimitados por liñas entre azuis e agrisadas; en segundo lugar segmentos de "piña piñonera" nos que sobre fondo melado se identifican escamas en branco; finalmente, en terceiro lugar segmentos con aspecto filamentoso verde. As teselas resultaron do seccionado de varetas mais ou menos grosas conformadas por fíos ou varetas polícromas máis finas unidas e dispostas segundo o motivo floral que se desexaba conformar.