Cesar Augusto

Seu nome na infancia foi Caius Octavius Thurinus. Tras a adopción testamentaria do seu tío avó, Julio César, pasou a chamarse Caius Iulius Caesar Octavianus. Finalmente, o 16 de xaneiro de 27 a. C., por aclamación do Senado por proposta de L. Munacio Planco, o seu nome oficial quedou fixado como IMPERATOR CAESAR AVGVSTVS. Tras a súa morte, dende o 17 de setembro de 14 d. C., cando foi declarada a súa apoteose, recordóuselle sempre como Divus Augustus. (Roma, 23 de setembro de 63 a. C. - Nola, 19 de agosto de 14 d. C.).
É considerado o primeiro e máis importante dos emperadores romanos, aínda que el mesmo non se considerou como tal durante o seu reinado, preferindo usar o título republicano tradicional de princeps civium (isto é, o primeiro dos cidadáns). Por esta causa, os romanos coñeceron o novo sistema político como Principatus. Tras unha longa guerra civil, Augusto mantivo externamente as institucións republicanas, pero en realidade reinou como un autócrata durante máis de 40 anos, transformando definitivamente a República romana no Imperio. Rematou cun século de guerras civís e deu a Roma unha era de paz (Pax Romana), prosperidade e grandeza.