Capitel corintio, moi deteriorado, de mármore con vetas grises, de baixa calidade, tamén chamado do país.

O seu cesto, moi fundido na parte inferior, organízase por medio de dúas coroas de follas que se separan lixeiramente do "kálathos", producindo efectos claroscuristas. A nervadura central destas aparece delimitada por dos profundos sucos que chegan ata a base das follas, os lóbulos son de extremos redondeados e pouco marcados e están sinalados por medio dunha incisión en trépano a ámbolos dous lados do nervio e unha zona de sombra en forma de bágoa. Entre as follas da segunda coroa xorden os caulículos, curtos e de estrías oblicuas, que abríndose en abano prolónganse para formar unhas hélices moi convencionais, debaixo dun ábaco de lembranzas clásicas. Debido ó deterioro do capitel non é posible certifica-la existencia de volutas.

Cabeza humana con arranque de torso. Amosa unha lixeira inclinación cara ao lado dereito e os rasgos faciais representados de forma esquemática e ruda, non exenta de singularidade expresiva. Os ollos, moi xuntos, sinálanse por medio de dous pequenos ocos circulares a ámbolos dous lados dunha liña que debuxa o nariz, cos seus orificios incisos. A boca, tamén levemente inclinada, está formada por un simple suco.

No lado dereito da cara, e anatomicamente moi adiantada, representouse a orella, formada por un semicírculo cun punto inciso central; no lado esquerdo non aparece. Trala orella sinálase unha pequena protuberancia que ten continuidade nunha liña curva incisa na caluga, que cabe interpretar como casco ou capacete, moi axustado (o que fai pensar que sería de coiro). No pescozo apréciase claramente a presencia ornamental dun torques.

Machado bifacial de talón con dous aneis de posición media. Presenta varios nervios na folla e rebordos no talón. Peza sen rematar: nervios feitos de xeito irregular, sen extraer o cono de fundición, un dos aneis non está furado e o outro só parcialmente.

Machado de talón bifacial de un só anel de posición media. A folla presenta un nervio central e carece de rebordos.

Machado bifacial de talón con dous aneis e un nervio sen tope. Folla e talón con rebordos laterais. Aneis de posición baixa.

Machado plano de talón truncado, perfil trapezoidal, e lados cóncavos con gume destacado. A sección é rectangular adelgazada no talón.

Peza co soporte de cartón duro; reverso de tecido de damasco, enmarcada por fita, no anverso figura o anagrama IHS coroado, distribuíndose ao redor un profusa ornamentación vexetal a base de roleos e tornapuntas simétricas, realizada en bordado plano de punto matizado silueteado por cordoncillos, acadando un efectivo contraste sobre o fondo grana.

A morfoloxía xeral da peza é apuntada, triangular, con base recta e sección disimétrica. O corpo é de tendencia alongada. Os bordos son converxentes e recto-convexos. O retoque é de amplitude profunda, de posición bifacial, de delineación simple e modo plano e cubrinte. Presenta dúas fracturas recentes, que se aprecian nun dos vértices inferiores e no apéndice superior. Índices: IL: 2,12 (longa),IE. 3,42 (grosa)

A morfoloxía xeral da peza é asimétrica e apuntada, con corpo triangular e base de pedúnculo trapezoidal con lados converxentes, a sección é convexo-cóncava e os entalles que se sitúan nunhas aletas non desenroladas, teñen tendencia recta. O corpo é de alongamento medio. O retoque é de amplitude profunda, posición bifacial, delineación denticulada composta e modo plano, marxinal e continuo. Os índices: IL. 1,72 (media), ILB. 3,80 (corta), IE. 3,14 (grosa).

A morfoloxía xeral da peza é apuntada, triangular, con base cóncava e simple, de sección biconvexa, bordos converxentes e rectilíneos, e aletas con tendencia recta. O corpo é de alongamento medio. O retoque é de amplitude profunda, posición bifacial, delineación denticulada e composta, e modo plano e cubrinte. Índices: IL. 1,87 (media), IE. 7.17 (media).