Fragmento dun axitador do que só se conserva unha extremidade e un sector do corpo en forma de espiral, aínda que logo puído todo ao lume. Na parte superior da extremidade conserva unha impronta moi superficial coas letras, VIX.

Oliña de pequenas dimensións. De forma seimesférica e fondo plano. Presenta na ombreira catro acanaladuras paralelas que marcan o incio do corpo.

Xerra/ola biansada de perfil sinuoso desenvolto e colo troncocónico. O corpo é carenado e descansa sobre unha base plana cun pequeno resalte de talón o que lle proporciona unha singular morfoloxía. Está realizada nunha pasta laranxa clara, cuberta, a excepción do fondo, por un engobe brillante nun ton máis escuro.

Vaso de bordo cóncavo, corpo piriforme e base plana. Presenta decoración de varias acanaladuras na zona de transición do pescozo ao corpo. A base é lisa e estreita en contraposición ao corpo de ampla forma. A pasta de tonalidade ocre ten un acabado de aspecto metalizado e brillante produto do pulimento ao que se sometía a peza atendendo á súa funcionalidade e aspecto decorativo.

Ola de bordo flexionado, exvasado e oblicuo, de labio redondeado, perfil sinuoso e achaparrado. Presenta unha asa plana con depresión central, que arrinca do beizo e remata na zona de maior diámetro.

Está feita cunha pasta de coloración gris-escura, e está decorada, na zona media do corpo, por un motivo plástico composto por dúas molduras perimetrais horizontais.

Ola de corpo globular, de bordo facetado, labio exvasado e redondeado, fondo plano e sen resalte de talón.

Presenta unha decoración básica de dous cordóns de sección triangular que contribúen a reforzar a peza. A superficie exterior é moi fina e alisada, o que lle proporciona un acabado brillante.

Presenta restos de feluxe adheridos á súa parede exterior.

Chave ("clavis") que presenta un paletón en forma de L. A tixa ten unha perforación circular no extremo oposto ao paletón.

Prato de terra sigillata con sigillum indescifrable. Na súa superficie externa conserva un graffiti, cuxa inscrición é SNS.

Campaíña de forma piramidal e sección rectangular rematada en catro apéndices de forma redondeada nas esquinas da base. Na parte superior presenta anel de suspensión. Conserva o badalo de ferro, formando masa no interior da peza.

O motivo decorativo desta peza, que representa a escena do baño de Venus-Afrodita, é netamente helenístico. A deusa aparece espida, de perfil á dereita da composición, co cabelo recollido nun moño alto, o brazo esquerdo apoiado sobre unha rocha na que repousa o seu manto, mentres coa man dereita descalza un dos seus pés, preparada para o baño. Á súa esquerda, a figura da serventa sostén un recipiente desde o que verte a auga que servirá para o baño da deusa sobre unha bañeira globular de tres pés.