Gran recipiente de corpo globular e base plana de reducidas dimensións. Ten un bordo de sección triangular con rebordo (para asento dunha tapadeira ou opercula, (hoxe perdida). Próximas ao bordo presenta dúas asas afrontadas, de sección bilobulada ao exterior e plana ao interior.

A pasta é de cor avermellada con abundante desgraxante de cuarzo branco, recuberta ao exterior por unha fina capa de engobe brillante de cor alaranxada, que se mantén principalmente na metade inferior.

Xerriña con dúas asas laterais, de sección circular. Está case completa, soamente lle faltan partes do borde, e bordes da base anular. Presenta borde aberto do que saen as dúas asiñas cilíndricas que, a súa vez, arrancan da parte baixa do corpo de perfil sinuoso. Na parte da curvatura, á altura do arranque inferior da asa, presenta dous sucos horizontais e paralelos, soamente interrompidos por ese arranque, cheos de impresións que semellan seren de xeito circular as de arriba, e como SSS as de abaixo. Esta banda decorada ten un ancho de 7 mm. No fondo presenta resalte en coroa. A pasta é marrón, roxiza polo medio, e con engobe marrón escuro polas dúas caras (máis escuro no interior), onde tamén presenta alisado. Grans de mica como desgrasante.

A xerra contiña oito moedas de bronce, pegadas en dous grupos: un de tres e outro de cinco moedas. Tiñan a particularidade de conservaren restos dun tecido adherido a elas, o que indicaría que estarían envoltas nel.

Asa 1: Altura 5,2; anchura 1 e grosor 0,9 cm

Asa 2: Altura 5,3; anchura 1,1 e grosor 0,9 cm

Peza sobre canto con talla bifacial simple. Base semicircular e bordos converxentes. Fractura distal. Pequena reserva de codia en zona proximal esquerda do anverso.

Patinado.

Doa branca, queimada e cuarteada. Presenta cinco pequenos buratiños por todo arredor, como para incrustar algo. Ten unha forma bastante irregular.

Case a metade completa dunha doa de cor amarelo que presenta resalte nos dous bordes, e outros redondeados (a xeito de puntos) polo medio.

Lasca secundaria.Talón extraído, fío convexo. Presenta retoques de diversa morfoloxía e tendencia invasora na cara ventral, sendo simples e profundos na dorsal.

Patinada.

Peza sobre canto, base reservada. Bordo convexo no extremo distal, talla bifacial simple superficial.

Patinado.

Preparado sobre canto rodado, de tipo tartaruga. Presenta negativos de lascas orientadas cara ao interior e organizadas en torno á peza. Creación dunha aresta saxital debido ao descortizado de parte do contorno na cara oposta para a creación dun ángulo de facetado axeitado, resultando os planos de percusión lisos.

Anverso: NERO. CAESAR. AVG. IMP.

Cabeza núa de Nerón mozo á dereita.

Reverso: PONTIF. MAX..TR. P. III. P. P. ao redor de coroa de carballo con EX. S. C. no interior.

Sítula ou pequeno caldeiro realizado nunha fina lámina de metal por martelado e estirada a torno. Presenta forma bitroncocónica, con forte carena no terzo inferior, fondo lixeiramente convexo e bordo exvasado, rematado nunha pestana vertical.