Trisquel con raios en sentido sinistroso. A execución semella que foi boa, pero o fragmentamento da peza, con sinais evidentes de ter sido retocado para unha posterior reutilización, impide precisar máis detalles da súa decoración.

Peza cilíndrica cunha decoración formada a partir dun punto central enmarcado por un rombo de lados cóncavos. Á súa vez, este vai inscrito noutros dous semellantes franqueados por baquetóns curvos paralelos. Case non se aprecia, pero posiblemente tivo unha moldura circundante

Motivo decorativo: Xeométrico, romboidal.

Rosácea de seis pétalos con punto central labrados a base de rebaixar os espazos intercalados con triángulos de lados curvos, co que resultan outros seis pétalos circundantes.

Ten dúas molduras circulares do mesmo ancho (4 cm.) e a posterior está decorada con motivo de cordado moi realzado.

Tríscele de raios en sentido dextrorso cunha moldura lisa circundante.

Rosácea de seis pétalos (hexapétala ou sexafolia) con punto central logrados a base de rebaixar os espacios intercalados con triángulos de lados curvos, co que resultaran outros pétalos circundantes. Cara atrás hai dous toros sen decoración, sensiblemente máis ancho o primeiro (3 cms) que o máis retrasado (2,5 cms).

Esvástica de seis raios en sentido dextrorso circundados por unha moldura lisa á que lle faltan grandes anacos. Entre esta moldura e o corpo lonxitudinal da peza existe unha gran depresión. Os motivos decorativos consisten nunha esvástica e raiado.

Trisquel de raios en sentido dextrorso cunha moldura lisa arredor. A execución do motivo non é moi boa, sendo os raios totalmente desiguais en anchura.

Esvástica ou roda de raios curvos en sentido sinistroso. Está tan mutilada e erosionada que non é posible precisar cantos raios tería, posiblemente oito. Aprecianse restos dunha moldura lisa enmascarando o motivo principal.

Trátase dun paralelepípedo traballado nunha das súas caras estreitas. O motivo, de arriba a abaixo, consiste nun círculo cunha suave incisión, tamén circular, no interior; o resto da peza está verticalmente labrado en forma de toro liso.

Fragmento dunha estatua de guerreiro, da que só se conserva o torso, algo mutilado e cortado xusto por baixo do cinto.

Ten as características iconográficas de tódalas estatuas de guerreiros galaicos: figura ergueita cos brazos pegados ao corpo, aínda que o esquerdo está mutilado xusto por debaixo dos brazaletes; a man dereita, ao mesmo tempo que sostén unha espada de folla ancha e alongada, de tipo "parazolium" repousa no escudo. Leva unha coiraza, da que teñen desaparecido os bicos superiores; aínda que moi erosionada, vese unha liña vertical que corre polo centro do peito e, sobre todo, polas costas. A camisa remata nos brazos a media manga, por riba dos brazaletes ou "viria", que están formados por tres ou catro toros, segundo sexa o brazo esquerdo ou o dereito. O cinto está formado por dous baquetóns ou toros lisos paralelos, e non se manifestan restos de presillas de suxeición.

O escudo ou "caetra", redondo, está completamente liso, sen sinais de inscrición ou decoración e seu umbo destaca lixeiramente. Por detrás das costas non se sabe como remataría, pois na parte da cintura ten unha profunda abrasión.